SMART markmið

Mín líðan mælir með að nota SMART markmiðasetningu. SMART markmið​ eru:
1) Skýr
2) Mælanleg
3) Aðgerðamiðuð
4) Raunhæf
5) Takmörkuð við tíma.

SKÝR
Markmiðið verður að vera skýrt ​og skipta þig máli. Þú þarft að tilgreina á nákvæman hátt hverju þú vilt ná fram. Því skýrara sem markmiðið er, því líklegra er að þú náir því.

MÆLANLEG
Markmiðið verður að vera mælanlegt​. Mælanlegt markmið hjálpar þér að meta árangurinn og sjá hvort og hvenær markmiðinu hefur verið náð. Markmið geta verið mælanleg í tíma, fjölda, magni, gæðum o.s.frv.

AÐGERÐAMIÐUÐ
Markmiðið verður að vera aðgerðamiðað​. Nauðsynlegt er að tilgreina hvernig þú ætlar að ná markmiðinu og lýsa því á nákvæman hátt. Hugsaðu um hvað þú þarft að gera til að ná markmiðinu og veltu fyrir þér hvort þú hafir allt sem til þarf.
(Athugasemd frá mér á grepper: Þessi þýðing á "Achievable" er ekki nógu góð finnst mér, þýðir að það þurfi að vera hægt að ná markmiðinu. Blandast samt vel inn í raunhæft svo þetta gengur upp)

RAUNHÆF
Markmiðið verður að vera raunhæft​, þ.e. þú verður að vilja og geta náð því. Settu þér markmið sem þú trúir að þú getir náð. Þú eykur líkur á að ná markmiðinu ef það er í samræmi við þitt andlega og líkamlega ástand, getu þína, hæfni, aldur og reynslu. Ef markmiðið er stórt er skynsamlegt að skipta því niður í nokkur skammtímamarkmið sem hægt er að ná á styttri tíma.

TAKMÖRKUÐ VIÐ TÍMA
Markmiðið verður að vera takmarkað við tíma. Mikilvægt er að þú setjir raunhæf tímamörk á markmiðið, annars er mjög freistandi að fresta því. Þú þarft að ákveða hversu langan tíma þú gefur þér til að ná markmiðinu, t.d. einn dag, eina viku, einn mánuð, sex mánuði eða eitt ár. Þó að þú setjir tímamörk á markmiðið er gott að vera sveigjanleg(ur) ef aðstæður hjá þér breytast.